ದಾಸರ ಸಂತೆ ಬಂತಂತೆ

 

ದಾಸರ ಸಂತೆ ಬಂತಂತೆ

ರಚಕ: ಡಾ. ಪ್ರಭಾಕರ್ ಬೆಳವಾಡಿ

ಊರಿಗೆ ಬಂತೆ ದಾಸರ ಸಂತೆ

ಇಂದಿನ ಸಂತೆ ವಿಶೇಷವಂತೆ II ಪಲ್ಲವಿ II

ಇದ್ದವರೆಲ್ಲಾ ನೂರಾರು ಚಿಂತೆ

ತಪ್ಪದೆ ಸಂತೆಗೆ ಬರಬೇಕಂತೆ II ಅನುಪಲ್ಲವಿ II

ಕಾಸಿನ ಚಿಂತೆ ಕೂಸಿನ ಚಿಂತೆ

ಸತಿಪತಿ ದಂಪತಿ ಸಮ್ಮತಿ ಚಿಂತೆ II 1 II

ಪರಿವಾರ ಚಿಂತೆ ಪರಿಹಾರವಂತೆ

ದಾಸರ ದಂಡೇ ಬಂದಿಹುದಂತೆ II 2 II

ನಂದ ಮುಕುಂದನ ನೋಡುವ ಚಿಂತೆ

ಹರಿ ಗೋವಿಂದನ ಕೂಡುವ ಚಿಂತೆ II 3 II

ಎಲ್ಲಕೂ ಇಲ್ಲಿ ಔಷಧಿಯಂತೆ

ತಪ್ಪದೇ ನೀವು ಪಾಲಿಸಿದಂತೆ II 4 II

ಪುರಂದರದಾಸನ ವಿಚಾರವಂತೆ

ಕನಕದಾಸನ ಆಚಾರದಂತೆ II 5 II

ವಿಜಯವಿಠ್ಠಲನ ಸುವಿಚಾರವಂತೆ

ಗೋಪಾಲದಾಸನ ವ್ಯವಹಾರದಂತೆ II 6 II

ಸಾವಿನ ನೋವಿನ ಚಿಂತೆಗೆ ಬಂತೆ

ದಾಸ ಮಹಿಮರ ಔಷಧಿ ಕಂತೆ II 7 II

ಕಾಸಿಲ್ಲವಂತೆ ಕೊಸರಿಲ್ಲವಂತೆ

ಭಕ್ತಿಯೇ ಇಲ್ಲಿ ಪ್ರಧಾನವಂತೆ II 8 II

ದಾಸರ ಪದಗಳೇ ಸಿಹಿಮದ್ದಂತೆ

ಪ್ರಭಾಕರ ಶರ್ಮ ತಿಳಿಸಿರುವಂತೆ II ಮಂಗಳ II