‘ಶಿವ ನಾಮದ ಫಲ’

 

 

‘ಶಿವ ನಾಮದ ಫಲ’

ಕರ್ತೃ: ಡಾ. ಪ್ರಭಾಕರ್ ಬೆಳವಾಡಿ  

 

‘ಓಂ ನಮಃ ಶಿವಾಯ’ ನಾಮವ ಬರೆದು

ಅಭಿಷೇಕ ಮಾಡಿ ನೊರೆ ಹಾಲನು ಕರೆದು

ನರರೆಲ್ಲಾ ನಲಿಯುತ್ತಾ ನಮಿಸಿರಿ ನೆರೆದು

ಪ್ರಸಾದ ನೀವಿತ್ತಿ ನೆರೆಹೊರೆಯರ ಕರೆದು

 

ಪೂಜಿಸಿ ನೀವಿಂದು ಮಾತ್ಸ್ಯರ್ಯ ತೊರೆದು

ನಮಿಸಿ ಅವಗಿಂದು ಏಕ ಬಿಲ್ವವನು ಎರೆದು

ಭಜಿಸಿ ನಾಮವನಿಂದು ಮದವನ್ನು ಜರಿದು

ಒಲಿಯುವನು ಕಾಮ ಕ್ರೋಧಗಳ ಹರಿದು

 

ದಹಿಸುವನು ಪಾಪಗಳ ಮುಕ್ಕಣ್ಣ ತೆರೆದು

ಪಾವನಗೊಳಿಸುವನು ಗಂಗೆಯನು ಸುರಿದು

ಶಿವ ನಾಮವ ಜಪಿಸಿರಿ ಭಕ್ತಿಯಲಿ ಮೆರೆದು

ಈ ಶಿವ ನಾಮದ ಫಲವು ಮತ್ತೆಲ್ಲೂ ಬರದು

ನೀತಿ ಪಂಚಕಂ

 

ನೀತಿ ಪಂಚಕಂ

ಕರ್ತೃ: ಡಾ. ಪ್ರಭಾಕರ್ ಬೆಳವಾಡಿ

ಬ್ರಹ್ಮ ಮುರಾರಿ ಸುವರ್ಜಿತ ಮೋಹಂ

ಕಶ್ಮಲ ದೂಷಿತ ವಿಸರ್ಜಿತ ಮೋಹಂ

ಜನುಮಕೆ ಕಂಟಕ ಕಾರಕ ಮೋಹಂ

ತತ್ ಕಾರಣ ತೊರೆಯಿರಿ ಮೋಹಂ

 

ಅಧಿಕ ಆಸ್ತಿಯ ಗಳಿಸಲು ದಾಹಂ

ಅಧಿಕಾರದ ಮದ ಏರಿಪ ದಾಹಂ

ಅಧಿನಾಯಕನ ಜರಿಯುವ ದಾಹಂ

ಸರ್ವನಾಶದೆಡೆ ಮುನ್ನುಡಿ ದಾಹಂ

 

ಸುಂದರ ವದನ ಪಡೆಯುವ ಮೋಹಂ

ಅಂದ ಭಕ್ತಿಯನು ತೋರಿಪೆ ದ್ರೋಹಂ

ಚಂದದ ತರುಣಿಯ ಭೋಗಿಪ ಮೋಹಂ

ಜನುಮದ ವಿನಾಶಕೆ ಕಾರಣ ಖಚಿತಂ

 

ರಾವಣ ವಿನಾಶಕೆ ಕಾರಣ ದಾಹಂ

ಕಂಸ ವರ್ಧನಕೆ ಸಕಾರಣ ದರ್ಪಂ

ಶಿವ ಮುನಿಯಲು ಮೂಲವು ಕಾಮಂ

ಮೋಹಂ ದಾಹಂ ಸುನಿಶ್ಚಿತ ದುಃಖಂ

 

ಸತ್ಸಂಗ ಸದ್ಭಕ್ತಿಗೆ ಒಲಿಯುವ ದೇವಂ

ಸತ್ಭಾವನೆ ಸದ್ಬುದ್ಧಿಗೆ ನಲಿಯುವ ದೇವಂ

ಸತ್ಕರ್ಮ ಸಚ್ಚರಿತ್ರೆಗೆ ಗೆಲಿಸುವ ದೇವಂ

ತತ್ಪ್ರಣಮಾಮಿ ಆ ಶಿವ ಮಹಾದೇವಂ

ಪ್ರಭಾಕರ ಶರ್ಮ ವಿರಚಿತ ಪಂಚಕಮಿದಂ ಭಜಂ

ಶಿವಲೋಕಮವಾಪ್ನೋತಿ ಶಿವೇನ ಸಹ ಸನ್ನಿಧಿಂ

ಶಿವ ಶಿವ ಎಂದರೆ..

 

ಶಿವ ಶಿವ ಎಂದರೆ..

ರಚನೆ: ಡಾ. ಪ್ರಭಾಕರ್ ಬೆಳವಾಡಿ

II  ಶಿವ ಶಿವ ಎಂದರೆ ಜಗವೆಲ್ಲಾ
ಜಗಮಗ ನೋಡು ಜನರೆಲ್ಲಾ
ಶಿವನೇ ಕಾಯುವ ನಮಗೆಲ್ಲಾ   II

ನಿರತ ಧ್ಯಾನವ ಮಾಡುತಿರು
ನಮ್ಮವರೆಲ್ಲರೂ ಅನ್ನುತಿರು
ಅನ್ಯರು ಅವರು ಅನ್ನದಿರು
ನಿರತ ಸಾಧನೆ ಮಾಡುತಿರು
ಸಾಧನೆಗೈದರೂ ಮೆರೆಯದಿರು
ಸಹಪಾಠಿಗಳನೂ ಸಲಹುತಿರು

II  ಶಿವ ಶಿವ ಎಂದರೆ ಜಗವೆಲ್ಲಾ
ಜಗಮಗ ನೋಡು ಜನರೆಲ್ಲಾ
ಶಿವನೇ ಕಾಯುವ ನಮಗೆಲ್ಲಾ II
 
ಲೋಭಿಯಾಗಿ ಇರಲೂಬೇಡ
ರೋಗಿಯಾಗಿ ಬಳಲಲೂ ಬೇಡ
ಕಲಿಯುತ ಕಲೆಯುತ ಇದ್ದುಬಿಡು
ಕಲಿಸುತ ನಲಿಯುತ ಗೆದ್ದುಬಿಡು
ಶಿವನ ಸೇವೆಯ ಮಾಡುತಿರು
ಕೈಲಾಸಕೆ ದಾರಿಯು ಅನ್ನುತಿರು

II  ಶಿವ ಶಿವ ಎಂದರೆ ಜಗವೆಲ್ಲಾ
ಜಗಮಗ ನೋಡು ಜನರೆಲ್ಲಾ
ಶಿವನೇ ಕಾಯುವ ನಮಗೆಲ್ಲಾ II

ಅನಾಚಾರದಿ ದೂರವಿರು
ಅಪಕಾರವ ನೀ ಮಾಡದಿರು
ಅನ್ಯರ ನೀನು ದೂರದಿರು
ಅಸಹ್ಯ ಮಾತನು ಸಾರದಿರು
ಶಿವನ ಭಜನೆ ಮಾಡುತಿರು
ಶಿವನೇ ಜಗವು ಎನ್ನುತಿರು

II  ಶಿವ ಶಿವ ಎಂದರೆ ಜಗವೆಲ್ಲಾ
ಜಗಮಗ ನೋಡು ಜನರೆಲ್ಲಾ
ಶಿವನೇ ಕಾಯುವ ನಮಗೆಲ್ಲಾ II

ಮೃತ್ಯುಂಜಯನೇ ಶಿವನು
ಸರ್ಪಭೂಷಣ ಶಿವನು
ಗಂಗೆಯ ಹೊತ್ತಿಹ ಶಿವನು
ತ್ರಿಶೂಲಧಾರಿ ಶಿವನು
ಮಹಾದೇವನೇ ಶಿವನು
ಶಂಭೋ ಶಂಕರ ಶಿವನು

II  ಶಿವ ಶಿವ ಎಂದರೆ ಜಗವೆಲ್ಲಾ
ಜಗಮಗ ನೋಡು ಜನರೆಲ್ಲಾ
ಶಿವನೇ ಕಾಯುವ ನಮಗೆಲ್ಲಾ II