ತೇರು ತೇರಣ್ಣ ತೇರು ತೇರುತೇರು
ತೇರು ತೇರಣ್ಣ ತೇರು ತೇರುತೇರು
ಬೆಟ್ಟಾದ ಬಯಲಾಗ ಏರುತೇರು ಸೇರುತೇರು
ಗರಿಗರಿ ಸೀರಿಯನುಟ್ಟು ಮಿರಿಮಿರಿ ಕುಪ್ಪಸ ತೊಟ್ಟು
ಹೊಳಪಿನ ಹಣಿ ನಡುವೆ ಕೆಂಪಾದ ಕುಂಕುಮ ಬೊಟ್ಟು
ನಮ್ಮವ್ವ ಚಾಮುಂಡಿ ಕುಂತಾಳ ಮೂಗುತಿ ತೊಟ್ಟು
ಭಲ್ಲೆಯನೆತ್ತುತ ದುಷ್ಟರ ನೋಡ್ಯಾಳ ಕೆಂಗಣ್ಣು ಬಿಟ್ಟು
ತೇರು ತೇರಣ್ಣ ತೇರು ತೇರುತೇರು
ಬೆಟ್ಟಾದ ಬಯಲಾಗ ಏರುತೇರು ಸೇರುತೇರು
ಮಾವಿನ ಎಲಿ ತನ್ನಿ ಹೂವಿನ ಮಾಲೆಯ ತನ್ನಿ ತೋರಣ ಒಟ್ಟಿ
ಹೊಸದಾಗಿ ಹೊಸೆದ ನಾರಿನ ಹಗ್ಗವ ಬಿಗಿಯುತ ತೇರಿಗೆ ಕಟ್ಟಿ
ಅಂಗನೆಯರೆಲ್ಲ ಇಟ್ಟಿಹರು ಬಣ್ಣದ ರಂಗೋಲಿ ತೇರನು ಮುಟ್ಟಿ
ಹಾರವ ಬಂದಾನ ಮಾರೋವ ತಂದಾನ ಮಲ್ಲೆ ಹೂವಿನ ಬುಟ್ಟಿ
ತೇರು ತೇರಣ್ಣ ತೇರು ತೇರುತೇರು
ಬೆಟ್ಟಾದ ಬಯಲಾಗ ಏರುತೇರು ಸೇರುತೇರು
ಹೊತ್ತಾನ ಮುರಾರಿ ತಾನಿಂದು ಕೂರ್ಮಾವತಾರವ ತೊಟ್ಟು
ಹಿಡಿಯಿರಿ ಮಲ್ಲರೆ ಭಾರದ ಹಗ್ಗವ ನಿಮ್ಮ ಹೆಗಲ ಮೇಲೊಟ್ಟು
ಹತ್ತಾರು ಜನರ ನೂರಾರು ಕೈಗಳ ಭಕ್ತಿಯ ಶಕ್ತಿಯ ಒತ್ತೆಗೆ ಇಟ್ಟು
ಮೈಯ್ಯ ಮೈಯ್ಯಿಗೆ ತಿಕ್ಕಿ ಎಳೆಯೋಣ ಜಾತಿ ಬೇಧಗಳ ಬದಿಗಿಟ್ಟು
ತೇರು ತೇರಣ್ಣ ತೇರು ತೇರುತೇರು
ಬೆಟ್ಟಾದ ಬಯಲಾಗ ಏರುತೇರು ಸೇರುತೇರು
ಚಿಣ್ಣರಿಗುಂಟು ಬಣ್ಣದ ಬತ್ತಾಸು ಅಂದು ಅದು ಮೂರೇ ಕಾಸು
ದಣಿದು ಬಂದವರಿಗುಂಟು ಶುಂಠಿ ಬೆರೆತ ತಾಜಾ ಕಬ್ಬಿನ ಜೂಸು
ನಲ್ಲ ನಲ್ಲೆಯರಿಗುಂಟು ಹಸಿರಾಗಿ ಬೆಳೆದ ತಂಪಾದ ಹುಲ್ಲಿನ ಹಾಸು
ಮಾತೆಯರ ಮರೆತಿಲ್ಲ ನಮ್ಮವ್ವ ಇಟ್ಟಾಳೆ ಬಣ್ಣದ ಬಳೆಗಳ ಸೊಗಸು
ತೇರು ತೇರಣ್ಣ ತೇರು ತೇರುತೇರು
ಬೆಟ್ಟಾದ ಬಯಲಾಗ ಏರುತೇರು ಸೇರುತೇರು
ಕಡಲೇಪುರಿಯ ಕೊಂಡು ಇಂದು ಹತ್ತಾರು ಸೇರು
ಮರೆಯದೇ ತೇರಿಗೆ ಬಾಳೆಯ ಹಣ್ಣನು ತೂರು
ಒಲಿದು ಹರಸಾಳು ನಮ್ಮವ್ವ ಬಾಗುತ ಕೋರು
ತೇರಿಗೆ ನಮಿಸಿ ಮಾತೆಯ ಪೂಜಿಸಿ ಬಂದೋರು
ತೇರು ತೇರಣ್ಣ ತೇರು ತೇರುತೇರು
ಬೆಟ್ಟಾದ ಬಯಲಾಗ ಏರುತೇರು ಸೇರುತೇರು
ತೇರೆಂದರೆ ಅದು ತೇರಲ್ಲ ಮಾತೆಯ ಅಂಬಾರಿ
ಬರುವುದು ನೋಡಣ್ಣ ವರುಷಕೆ ಒಂದೇ ಸಾರಿ
ಬನ್ನಿ ಎಳೆಯೋಣ ನಾವು ನೀವೆಲ್ಲಾ ಒಟ್ಟಾಗಿ ಸೇರಿ
ಕಷ್ಟ ನಷ್ಟಗಳ ದುಃಖ ದುಮ್ಮಾನಗಳ ಗಾಳಿಗೆ ತೂರಿ
ತೇರು ತೇರಣ್ಣ ತೇರು ತೇರುತೇರು
ಬೆಟ್ಟಾದ ಬಯಲಾಗ ಏರುತೇರು ಸೇರುತೇರು
ರಚಕ: ಡಾ. ಪ್ರಭಾಕರ್ ಬೆಳವಾಡಿ
ಕಾಮೆಂಟ್ಗಳಿಲ್ಲ:
ಕಾಮೆಂಟ್ ಪೋಸ್ಟ್ ಮಾಡಿ