ಎಷ್ಟು ಧನ್ಯರೋ, ಎನಿತು ಮಾನ್ಯರೋ

 

ಎಷ್ಟು ಧನ್ಯರೋ, ಎನಿತು ಮಾನ್ಯರೋ

 

ಅಷ್ಟಮಿ ದಿನದಂದು, ಅಷ್ಟಮನ ಪುಟ್ಟಿಸಲು

ವಿಶ್ವವನೇ ಒಳಗಿಟ್ಟು, ವಿಶ್ವವನೇ ಹೊರಬಿಟ್ಟ

ದೇವಕಿ ಎಷ್ಟು ಧನ್ಯಳೋ, ಎನಿತು ಮಾನ್ಯಳೋ II

 

ಹುಟ್ಟಿದ್ದ ಬಚ್ಚಿಟ್ಟು , ಗುಟ್ಟನು ಮಾಡದೇ ರಟ್ಟು

ಬಾಂಧವ್ಯ ಬದಿಗಿಟ್ಟು, ಬುಟ್ಟಿಯಲ್ಲಿ ತೇಲ್ಬಿಟ್ಟ

ಆ ದೇವಕಿ ಎಷ್ಟು ಧನ್ಯಳೋ, ಎನಿತು ಮಾನ್ಯಳೋ II

 

ಸೊಂಟದಲಿ ಎತ್ತಿಟ್ಟು , ತುತ್ತು ಅನ್ನವನಿಟ್ಟು

ಬಾಲನ ಲೀಲೆಗಳ ತನ್ನ ಕಣ್ಣಲಿ ತುಂಬಿಟ್ಟ

ಯಶೋಧ ಮಾತೆ ಎಷ್ಟು ಧನ್ಯಳೋ, ಎನಿತು ಮಾನ್ಯಳೋ II

 

ಆರಿಗುಂಟು ಆರಿಗಿಲ್ಲ ದೀನ ಸುಧಾಮನ ನಂಟು

ಪರಮಾತ್ಮನ ಅನುಗ್ರಹ ಪಂಚ ಪಾಂಡವರಿಗುಂಟು

ಇವರೆಷ್ಟು ಧನ್ಯರೋ ಮನುಜ, ಇವರೆನಿತು ಮಾನ್ಯರೋ II

 

ಯುದ್ಧ ಭೂಮಿಗೆ ಮೆಟ್ಟಿ, ಶಸ್ತ್ರಾಸ್ತ ಬದಿಗಿಟ್ಟು

'ಗೀತೋಪದೇಶದ', ವಿರಾಟ ರೂಪದದೃಷ್ಟ

ಪಡೆದ ಪಾರ್ಥನೆಷ್ಟು ಧನ್ಯನೋ, ಎನಿತು ಮಾನ್ಯನೋ II

 

ಭಕ್ತಿಯ ಬದಿಗಿಟ್ಟು, ಅಂಗಾಂಗ ಬಗ್ಗಿಸಿ, ಪಾದಕ್ಕೆ ತಾಗಿಸಿ

ಕಾಮ ಕ್ರೋಧಗಳ ಅನವರತ ನೀ ಬಿಡದೇ ಪಾಲಿಸೆ

ನೀ ಎಷ್ಟು ಧನ್ಯನೋ ಮನುಜ, ನೀ ಎನಿತು ಮಾನ್ಯನೋ II

 

ಮಾತೆಯರ ಅನುಕರಿಸು, ಪಾಂಡುರಂಗನ ಭಜಿಸು

ಪ್ರಭಾಕರ ಶರ್ಮನ ಈ ಮಾತ ನೀ ನಿತ್ಯವೂ ನೆನೆಸು

ಆಗಲೇ ನೋಡಯ್ಯ ಆಗುವೆ ಧನ್ಯನು, ನೀನೂ ಮಾನ್ಯನು II

ರಚನೆ: ಡಾ. ಪ್ರಭಾಕರ್ ಬೆಳವಾಡಿ 

ಮಂತ್ರಾಲಯ ನೋಡೋಣ ಬನ್ನಿ

 

ಮಂತ್ರಾಲಯ ನೋಡೋಣ ಬನ್ನಿ

ನಾವು ಬಂದೇವ ನಾವು ಬಂದೇವ

ಮಂತ್ರಾಲಯ ನೋಡೋದಕ್ಕ

ತುಂಗೆಯಲಿ ಮುಳುಗಿ ಏಳೋದಕ್ಕ

ರಾಯ, ರಾಯ, ರಾಯರಾಯರಾ 

 

ಬೃಂದಾವನದ ಅಂದವ ನೋಡೋದಕ್ಕ

ರಾಯರು ಬರುವ ಚೆಂದವ ನೋಡೋದಕ್ಕ

ರಾಯ, ರಾಯ, ರಾಯರಾಯರಾ

 

ಭಕ್ತಿ ಭಾವದ ಗೂಡಂತ, ಹೌದೇನಾ

ಪ್ರೇಮಾನುರಾಗದ ಬೀಡಂತ, ಮತ್ತೇನಾ

ಭಕ್ತರೇ ತುಂಬಿದ ಸಾಗರವಂತಾ

ಬಂಗಾರದ ತೇರನು ಎಳಿತಾರಂತಾ

ರಾಯ, ರಾಯ, ರಾಯರಾಯರಾ  

ನಾವು ಬಂದೇವ ನಾವು ಬಂದೇವ

ರಾಯ, ರಾಯ, ರಾಯರಾಯರಾ

ಮತ್ಯಾಕ, ತಡವ್ಯಾಕಾ ನಡೀರಿ ನೀವು

ಮಂತ್ರಾಲಯ ನೋಡದಕ್ಕಾ ..

ರಾಯ ರಾಯ ರಾಯರಾಯರಾ .....

ಡಾ. ಪ್ರಭಾಕರ್ ಬೆಳವಾಡಿ  

ಹರಿಹರಬ್ರಹ್ಮಮಯಮ್ ಜಗಮ್

 

ಹರಿಹರಬ್ರಹ್ಮಮಯಮ್ ಜಗಮ್

ಪರಿಸರ ನಿರ್ಮಿತ ದೇವ ಗಣಮ್

ಪ್ರಕೃತಿ ಪ್ರಧಾಯಕ ಈ ತ್ರಿಗುಣಮ್

ನಮಿಸುತ ನಿಲ್ಲಲಿ ಭೂಮಂಡಲಮ್ II

 

ನಿರ್ಮಲ ಭಾಷೆಯ ಆಡಲು ಭವ್ಯಮ್

ಕೋಮಲ ಮನದಲಿ ಪೂಜಿಸೆ ಧನ್ಯಮ್

ಕಾಮ ಕ್ರೋಧಗಳ ತ್ಯಜಿಸಲು ಕ್ಷೇಮಮ್

ಪ್ರೇಮ ಭಾವನೆಯ ತೋರಲು ಧರ್ಮಮ್ II

 

ನಿತ್ಯವೂ ನುಡಿಯೋ ಹರಿಹರಬ್ರಹ್ಮಮ್

ಸತ್ಯವ ನುಡಿಯೇ ಪಾವನ ಜನುಮಮ್

ಪಾಪ ವಿಮೋಚಕರೀ ಹರಿಹರಬ್ರಹ್ಮಮ್

ಶಾಪ ನಿವಾರಕರೋ ಹರಿಹರಬ್ರಹ್ಮಮ್ II

 

ಸರ್ವ ಸುಗಂಧ ಸುಲೇಪಿತ ನಾಮಮ್

ಗರ್ವ ಭಂಗಕರು ಹರಿಹರಬ್ರಹ್ಮಮ್

ದರ್ಪವ ಅಳಿಸುವ ಏಕೈಕ್ಯ ನಾಮಮ್

ಸರ್ಪಶಯನ ಸರ್ಪಧಾರಿ ಸಮೂಹಮ್ II

 

ಭಕ್ತಿಯಿಂದಲೀ ಮಾಡಲು ಧ್ಯಾನಮ್

ಶಕ್ತಿಯ ನೀಡುವರು ಹರಿಹರಬ್ರಹ್ಮಮ್

ಒಲಿದು ಬರುವರು ಹರಿಹರಬ್ರಹ್ಮಮ್

ಸುಲಿಯುತ ಪಾಪವ ಹರಿಹರಬ್ರಹ್ಮಮ್ II

 

ಹರನೇ ಬ್ರಹ್ಮಮ್ ಹರಿಯೇ ಬ್ರಹ್ಮಮ್

ಹರಿಹರ ತುಂಬಿಹ ಜಗವೇ ಬ್ರಹ್ಮಮ್

ಚರಾಚರ ಎಲ್ಲವೂ ಹರಿಹರಬ್ರಹ್ಮಮ್

ತತ್ಪ್ರಣಮಾಮಿ ನೀ ಹರಿಹರಬ್ರಹ್ಮಮ್ II

ರಚನೆ: ಡಾ. ಪ್ರಭಾಕರ್ ಬೆಳವಾಡಿ 

ಪದಗಳು ನಲವತ್ತು, ಹನುಮನ ತಾಕತ್ತು

 

ರಚನೆ: ಡಾ. ಪ್ರಭಾಕರ್ ಬೆಳವಾಡಿ 

ಆದಿ ಚೌಪದಿ ಪಲ್ಲವಿ

ಭಕ್ತನೆಂದರೆ ಹನುಮ, ಶಕ್ತನೆಂದರೆ ಹನುಮ

ಭಕ್ತರ ಮಾದರಿ ಹನುಮ, ಭಕ್ತಿಗೆ ದಾರಿ ಹನುಮ

ಸೇವಾ ಪುರುಷ ಹನುಮ, ಭಾವಾ ಪರವಶ ಹನುಮ

ಮುಖ್ಯ ಪ್ರಾಣ ಹನುಮ, ಸೌಖ್ಯಕೆ ತ್ರಾಣ ಹನುಮ

    

ಜಗದ ಪ್ರಾಣವೇ ನಮ್ಮಯ ಹನುಮ         1 

ಜಗದ ತ್ರಾಣವೇ ನಮ್ಮಯ ಹನುಮ         2

ರಾಮ ಧೂತನು ನಮ್ಮಯ ಹನುಮ          3

ಆಶ್ರಯ ದಾತನು ನಮ್ಮಯ ಹನುಮ        4

ವಾಯು ಪುತ್ರನು ನಮ್ಮಯ ಹನುಮ         5

ಗಣಪನ ಮಿತ್ರನು ನಮ್ಮಯ ಹನುಮ        6

ಬಾಲ ಪ್ರತಾಪಿ ನಮ್ಮಯ ಹನುಮ           7

ತ್ರಿಕಾಲ ವ್ಯಾಪಿ ನಮ್ಮಯ ಹನುಮ           8

ಲಂಕೆಗೆ ಜಿಗಿದವ ನಮ್ಮಯ ಹನುಮ         9

ಸಂಜೀವಿನಿ ತಂದವ ನಮ್ಮಯ ಹನುಮ      10

ಬ್ರಹ್ಮಚಾರಿಯು ನಮ್ಮಯ ಹನುಮ           11

ಸಾಕ್ಷಾತ್ಕಾರಿಯು ನಮ್ಮಯ ಹನುಮ         12

ಜ್ಞಾನ ಭಂಡಾರಿ ನಮ್ಮಯ ಹನುಮ          13

ದುಷ್ಟ ಸಂಹಾರಿ ನಮ್ಮಯ ಹನುಮ          14 

ಗದೆಯನು ಬೀಸಿದ ನಮ್ಮಯ ಹನುಮ       15

ಸೇತುವೆ ಹಾಸಿದ ನಮ್ಮಯ ಹನುಮ         16 

ಭಕ್ತಿ ಪ್ರಚೋದಕ ನಮ್ಮಯ ಹನುಮ          17

ಮುಕ್ತಿ ಪ್ರಧಾಯಕ ನಮ್ಮಯ ಹನುಮ        18

ಮುದ್ರಿಕೆ ಕೊಟ್ಟವ ನಮ್ಮಯ ಹನುಮ        19

ಲಂಕೆಯ ಸುಟ್ಟವ ನಮ್ಮಯ ಹನುಮ         20

ಗರ್ವವ ಅಳಿಸಿದ ನಮ್ಮಯ ಹನುಮ         21

ಗೌರವ ಉಳಿಸಿದ ನಮ್ಮಯ ಹನುಮ        22

ಇಷ್ಟ ಪ್ರದಾಯಕ ನಮ್ಮಯ ಹನುಮ         23

ಕಷ್ಟ ನಿವಾರಕ ನಮ್ಮಯ ಹನುಮ            24

ಪಾರ್ಥನ ಧ್ವಜದೊಳು ನಮ್ಮಯ ಹನುಮ    25

ಕರ್ತನ ಭುಜದೊಳು ನಮ್ಮಯ ಹನುಮ     26

ದುಃಖ ವಿಮೋಚಕ ನಮ್ಮಯ ಹನುಮ        27

ಸೌಖ್ಯ ಪ್ರಧಾಯಕ ನಮ್ಮಯ ಹನುಮ       28

ನಿತ್ಯದ ಭಜನೆಗೆ ನಮ್ಮಯ ಹನುಮ          29

ಎಲ್ಲರ ಭುಜಬಲ ನಮ್ಮಯ ಹನುಮ          30

ಅಂಜನಿ ಕಂದನು ನಮ್ಮಯ ಹನುಮ         31

ಕೇಸರಿ ನಂದನು ನಮ್ಮಯ ಹನುಮ         32

ಲಕುಮನ ಉಳಿಸಿದ ನಮ್ಮಯ ಹನುಮ      33

ಪ್ರಸಿದ್ಧಿ ಗಳಿಸಿದ ನಮ್ಮಯ ಹನುಮ          34

ಮಂಗಳ ಮೂರುತಿ ನಮ್ಮಯ ಹನುಮ       35

ಗಳಿಸಿದ ಕೀರುತಿ ನಮ್ಮಯ ಹನುಮ         36

ರಾಮನ ಚರಣದಿ ನಮ್ಮಯ ಹನುಮ        37

ಪಾಲಿಸು ಕರುಣದಿ ನಮ್ಮಯ ಹನುಮ        38

ನಾಲಿಗೆ ನುಡಿಯಲಿ ನಮ್ಮಯ ಹನುಮ       39

ನಿಮ್ಮೆದೆ ಗುಡಿಯಲಿ ನಮ್ಮಯ ಹನುಮ      4೦

ಅಂತ್ಯ ಚೌಪದಿ ಚರಣ

ಪ್ರಭಾಕರ ವಿರಚಿತ ಹನುಮನ ನುಡಿಯು,

ಪಾವನಗೊಳಿಸುವ ಗಂಧದ ಗುಡಿಯು.

ಹನುಮನ ಪಾದಕೆ ತಾಗಲಿ ಮುಡಿಯು,

ತುಂಬದೆ ಇರದೇ ನಿಮ್ಮಯ ಉಡಿಯು.

ಓದುತ ಭಕ್ತರೇ ಧನ್ಯರಾಗಿ, ಕೇಳುತ ಭಕ್ತರೇ ಮಾನ್ಯರಾಗಿ  

ಶಿವ ಶಿವ ಎಂದರೆ..

 

ಶಿವ ಶಿವ ಎಂದರೆ..

ರಚನೆ: ಡಾ. ಪ್ರಭಾಕರ್ ಬೆಳವಾಡಿ

II  ಶಿವ ಶಿವ ಎಂದರೆ ಜಗವೆಲ್ಲಾ
ಜಗಮಗ ನೋಡು ಜನರೆಲ್ಲಾ
ಶಿವನೇ ಕಾಯುವ ನಮಗೆಲ್ಲಾ   II

ನಿರತ ಧ್ಯಾನವ ಮಾಡುತಿರು
ನಮ್ಮವರೆಲ್ಲರೂ ಅನ್ನುತಿರು
ಅನ್ಯರು ಅವರು ಅನ್ನದಿರು
ನಿರತ ಸಾಧನೆ ಮಾಡುತಿರು
ಸಾಧನೆಗೈದರೂ ಮೆರೆಯದಿರು
ಸಹಪಾಠಿಗಳನೂ ಸಲಹುತಿರು

II  ಶಿವ ಶಿವ ಎಂದರೆ ಜಗವೆಲ್ಲಾ
ಜಗಮಗ ನೋಡು ಜನರೆಲ್ಲಾ
ಶಿವನೇ ಕಾಯುವ ನಮಗೆಲ್ಲಾ II
 
ಲೋಭಿಯಾಗಿ ಇರಲೂಬೇಡ
ರೋಗಿಯಾಗಿ ಬಳಲಲೂ ಬೇಡ
ಕಲಿಯುತ ಕಲೆಯುತ ಇದ್ದುಬಿಡು
ಕಲಿಸುತ ನಲಿಯುತ ಗೆದ್ದುಬಿಡು
ಶಿವನ ಸೇವೆಯ ಮಾಡುತಿರು
ಕೈಲಾಸಕೆ ದಾರಿಯು ಅನ್ನುತಿರು

II  ಶಿವ ಶಿವ ಎಂದರೆ ಜಗವೆಲ್ಲಾ
ಜಗಮಗ ನೋಡು ಜನರೆಲ್ಲಾ
ಶಿವನೇ ಕಾಯುವ ನಮಗೆಲ್ಲಾ II

ಅನಾಚಾರದಿ ದೂರವಿರು
ಅಪಕಾರವ ನೀ ಮಾಡದಿರು
ಅನ್ಯರ ನೀನು ದೂರದಿರು
ಅಸಹ್ಯ ಮಾತನು ಸಾರದಿರು
ಶಿವನ ಭಜನೆ ಮಾಡುತಿರು
ಶಿವನೇ ಜಗವು ಎನ್ನುತಿರು

II  ಶಿವ ಶಿವ ಎಂದರೆ ಜಗವೆಲ್ಲಾ
ಜಗಮಗ ನೋಡು ಜನರೆಲ್ಲಾ
ಶಿವನೇ ಕಾಯುವ ನಮಗೆಲ್ಲಾ II

ಮೃತ್ಯುಂಜಯನೇ ಶಿವನು
ಸರ್ಪಭೂಷಣ ಶಿವನು
ಗಂಗೆಯ ಹೊತ್ತಿಹ ಶಿವನು
ತ್ರಿಶೂಲಧಾರಿ ಶಿವನು
ಮಹಾದೇವನೇ ಶಿವನು
ಶಂಭೋ ಶಂಕರ ಶಿವನು

II  ಶಿವ ಶಿವ ಎಂದರೆ ಜಗವೆಲ್ಲಾ
ಜಗಮಗ ನೋಡು ಜನರೆಲ್ಲಾ
ಶಿವನೇ ಕಾಯುವ ನಮಗೆಲ್ಲಾ II

ರಾಮನ ಕಂಡೀರಾ

 

ರಾಮನ ಕಂಡೀರಾ ನೀವು ರಾಮನ ಕಂಡೀರಾ

ದಶರಥ ನಂದನ ರಾಮನ ಕಂಡೀರಾ

ಬಾಲರಾಮ ಕೋದಂಡರಾಮ

ಹನುಮನ ಹೃದಯದಿ ನೆಲಸಿಹ ರಾಮ

ತಂದೆಯ ಮಾತನು ಕೇಳಿದ ರಾಮ

ಕಾಡಲಿ ನೆಲಸಲು ಹೋದವ ರಾಮ

ವಿಶ್ವಾಮಿತ್ರ ಹರಸಿದ ರಾಮ

ಸಕಲ ವಿದ್ಯೆಯ ಗಳಿಸಿಹ ರಾಮ

ಶಬರಿಯ ಶಾಪವ ಬಿಡಿಸಿದ ರಾಮ

ವಾಲಿ ಸಂಹಾರಕ ಧೀರ ರಾಮ

ರಾವಣ ದರ್ಪವ ಇಳಿಸಿದ ರಾಮ

ರಾಮರಾಜ್ಯದ ಸ್ಥಾಪಕ ರಾಮ

ರಘುಪತಿ ರಾಘವ ರಾಜಾ ರಾಮ

ರಾಮನ ಕಂಡೀರಾ ನೀವು ರಾಮನ ಕಂಡೀರಾ

ದಶರಥ ನಂದನ ರಾಮನ ಕಂಡೀರಾ

ಜಯಜಯರಾಮ ಜಯಘನಶ್ಯಾಮ

ರಘುಕುಲ ತಿಲಕ ಆನಂದರಾಮ

ಸಕಲರ ಸಲಹುವ ಸೀತಾರಾಮ

ರಾಮರಾಜ್ಯವ ಆಳಿದ ರಾಮ

ರಾಮನ ಕಂಡೀರಾ ನೀವು ರಾಮನ ಕಂಡೀರಾ

ಈ ಪ್ರಭಾಕರ ಶರ್ಮನ ರಾಮನ ಕಂಡೀರಾ

ಮಾನಗೇಡಿ ಮಂಗ ಬಂತಮ್ಮ

                                                                 

 

ಮಾನಸ ಸರೋವರಕ್ಕೆ ಮಾನಗೇಡಿ ಮಂಗ ಬಂತಮ್ಮ

ರಂಗನ ಧ್ಯಾನಕೆ ಭಂಗ ತಂತಮ್ಮ           Iಪಲ್ಲವಿI

ಶಿವ ಪೂಜೆಯಲಿ ಕರಡಿ ಬಂದಂತೆ

ಪತಂಗದ ದಾರ ಹರಿದು ಬಿದ್ದಂತೆ

ಕಲ್ಪವೃಕ್ಷಗಳೇ ಕೊಚ್ಚಿ ಹೋದಂತೆ  

ಕಾಮಧೇನುವಿನ ಕ್ಷೀರವೇ ನಿಂತಂತೆ         I 1 I

ಮಾನಸ ಸರೋವರಕ್ಕೆ ಮಾನಗೇಡಿ ಮಂಗ ಬಂತಮ್ಮ

ಯಜ್ಞ ಕುಂಡದಲಿ ಹಲ್ಲಿ ತಾ ಬಿದ್ದಂತೆ

ತಪವ ಮಾಡುವಾಗ ಮೇನಕೆ ಬಂದಂತೆ

ಋಷಿಗಳ ಆಶ್ರಮಕೆ ರಕ್ಕಸ ಬಂದಂತೆ

ಪಾಯಸಕ್ಕೆ ಹುಳಿಯನು ಹಿಂಡಿದಂತೆ                  I 2 I

ಮಾನಸ ಸರೋವರಕ್ಕೆ ಮಾನಗೇಡಿ ಮಂಗ ಬಂತಮ್ಮ

ವಾಯುವಿನಲ್ಲಿ ತೂರಿ ಬಂತೆ

ಉಸುರಿನಲ್ಲಿ ಸೇರಿ ಬಂತೆ

ಸೂರಿನಿಂದ ಜಾರಿ ಬಂತೆ

ಹಿಂದಿನಿಂದ ಹಾರಿ ಬಂತೆ                    I 3 I

ಮಾನಸ ಸರೋವರಕ್ಕೆ ಮಾನಗೇಡಿ ಮಂಗ ಬಂತಂತೆ  

ಅದು ಹೇಗೆ ಬಂತೋ ತಿಳಿಯಾದಂತೆ

ಬಂದೇ ಬಂತಂತೆ ಧ್ಯಾನಕೆ ಭಂಗವ ತಂತಂತೆ

ಮಾನಸ ಸರೋವರಕ್ಕೆ ಮಾನಗೇಡಿ ಮಂಗ ಬಂತಂತೆ I 4 I

ರಂಗ ಬಾರೋ ವಿಠ್ಠಲ ಬಾರೋ ವೈಕುಂಠದಿ ಹರಿಯೆ ಬಾರೋ

ಮಾನಗೇಡಿ ಮಂಗನ ಹಿಡಿದು ನಿನ್ನಯ ಧ್ಯಾನಕೆ ತನ್ಮಯ ನೀಡಿ

ಧ್ಯಾನ ಮಗ್ನ ಪ್ರಭಾಕರನ ಮಂಗನ ಭಂಗದಿ ನೀ ಕಾಪಾಡ ಬೇಕಂತೆ 

ರಚನೆ : ಡಾ. ಪ್ರಭಾಕರ್ ಬೆಳವಾಡಿ      

ಕರುಣಿಸೋ ರಂಗ ಕರುಣಿಸೋ

 

ಕರುಣಿಸೋ ರಂಗ ಕರುಣಿಸೋ

ಕರುಣಿಸೋ ರಂಗ ಕರುಣಿಸೋ     II  ಪಲ್ಲವಿ II

 

ಆಡಿಸೋ ರಂಗ ಕರುಣಿಸೋ

ಕಾಡಿಸಲೇನು ಪೀಡಿಸಲೇನು ಬಂದೆನ್ನ ಕರುಣಿಸೋ    II  ಅನುಪಲ್ಲವಿ II

 

ಪರಿ ಪರಿ ಪರೀಕ್ಷೆಯ ಮಾಡಿದರೇನು

ಉರಿಯುವ ಬೆಂಕಿಗೆ ದೂಡಿದರೇನು

ಗುರಿಯನೇ ಇಟ್ಟು ಬಾಣವ ಹೂಡಿದರೇನು

ಹರಿ ನಿನ್ನ ಬಳಿಗೇ ಬರುವೆನೋ ನಾನು       II ೧ II

 

ಆಡಿಸೋ ರಂಗ ಕರುಣಿಸೋ

ಕಾಡಿಸಿ ಪೀಡಿಸಿ ಕರುಣಿಸೋ

 

ಸುಳಿಯ ಸೆಳೆತಕೆ ನೀ ಒತ್ತಿದರೇನು

ಉಳಿಯನೇ ಹಿಡಿದು ಕೆತ್ತಿದರೇನು

ಕುಳಿತು ಧ್ಯಾನವಾ ಮಾಡುವೆ ನಾನು

ಒಳಿತನೇ ರಂಗ ಮಾಡುವೆ ನೀನು           II  ೨ II

 

ಆಡಿಸೋ ರಂಗ ಕರುಣಿಸೋ

ಕಾಡಿಸಿ ಪೀಡಿಸಿ ಕರುಣಿಸೋ

 

ಕೋರಿ ನಿಂದಿಹೆನಿಂದು, ತೂರಿ ಚಕ್ರವನಿಂದು

ಹಾರಿಸೋ ರಂಗ ಮನದ ಮಲಿನವನಿಂದು

ತೋರಿಸೋ ಬಂದು ನೀ ಸನ್ಮಾರ್ಗವನಿಂದು

ಸ್ಮರಿಸುತ ಬಂದಿಹೆ ಗಂಗೆಯಲಿ ಮಿಂದು        II ೩ II

 

ಕಾಡಿಸಲೇನು ಪೀಡಿಸಲೇನು ಬಂದೆನ್ನ ಕರುಣಿಸೋ

ಭಕುತ ನಿನ್ನೀ ಪ್ರಭಾಕರ ಶರ್ಮನ ಪಾಲಿಸೋ

ಕರುಣಿಸೋ ರಂಗ ಕರುಣಿಸೋ

ರಚನೆ : ಡಾ. ಪ್ರಭಾಕರ್ ಬೆಳವಾಡಿ