ದೋಸೆಯ ಕಥೆ-ವ್ಯಥೆ
ತುಂಡು ಪಂಚೆಯ ಪಾಕಪ್ರವೀಣರೆ
ನೀವೇನು ಅಡಿಗೆ ಮಾಡಿದಿರಿ
ದೋಸೆಯ ಬಿಡುವ ಕಾವಲಿ ಮೇಲೆ
ಬೆವರಿನ ಹನಿಯ ಚೆಲ್ಲಿದಿರಿ
ಸೌಟನು ಹಿಡಿದು ಹಿಟ್ಟನು ಹರಡಿ
ತುಪ್ಪವ ಸವರಿ ತಿರುವಿದಿರಿ
ಆಲೂ ಪಲ್ಯವ ಒಳಗಡೆ ದೂಡಿ
ಮಡಿಸುತ ನೀವು ನೀಡಿದಿರಿ
ಗರಿ ಗರಿ ದೋಸೆ ಬಾಯಲಿ
ಸೇರಲು
ಇನ್ನೂ ತಿನ್ನುವ ಆಸೆಯು
ಆಗಲು
ಒಂದರ ಮೇಲೆ ಒಂದನು ತಿನ್ನಲು
ಬಿಲ್ಲನು ಕೊಟ್ಟಿರಿ ಬಲುಭಾರಿ
ಹೋದೆವು ನಾವು ಹೌಹಾರಿ
ಹೋದೆವು ನಾವು ಹೌಹಾರಿ
ರಚಕ: ಡಾ. ಪ್ರಭಾಕರ್ ಬೆಳವಾಡಿ
ಧರ್ಮವೆಂದು ದುಡಿ ಕರ್ಮದಂತೆ ಪಡಿ
ಕುರುಡು ತಾಯಿ ದುಡಿಯುತ ನಿಂತಳಂತೆ
ಅದು ಯಾಕೆ ಅಂತೆ?
ಮಕ್ಕಳ ಮೇಲಿನ ಮಮತೆಯಂತೆ
ಹೊಕ್ಕಳ ಬಳ್ಳಿಯ ಕರುಣೆಯಂತೆ
ಮಕ್ಕಳ ಬೆಳೆಸಿ ನೋಡುವ ಚಿಂತೆ
ಮಕ್ಕಳೇ ಮನೆಯ ಮಾಣಿಕ್ಯವಂತೆ
ರಟ್ಟೆಯ ಬಿಗಿದು ಒಗೆದಾಳಂತೆ
ಬಟ್ಟೆಯ ಮಡಿಸಿ ಒಟ್ಟಿದಳಂತೆ
ತುತ್ತನು ಕೊಟ್ಟು ಮುತ್ತಿಟ್ಟಳಂತೆ
ಹುತ್ತಕೆ ಹಾಲನು ಎರೆದಾಳಂತೆ
ಮಕ್ಕಳ ಓದಿಸಿ ಬೆಳೆಸಿದಳಂತೆ
ಹೊಕ್ಕಳ ಬಳ್ಳಿ ಕಡಿದಾವಂತೆ
ಅರಸುತ ಕೆಲಸ ಹಾರಿದರಂತೆ
ಹರಸುತ ತಾಯಿ ನಿಂತಿಹಳಂತೆ
ದಿನಗಳೇ ಕಳೆದು ಹೋದುವಂತೆ
ಮನದಲೇ ತಾಯಿ ಕೊರಗಿದಳಂತೆ
ದೂರದ ಕುಡಿಗಳ ಕಾಣುವುದೆಂತೆ
ಬಾರದ ನುಡಿಗಳ ಕೇಳುವುದೆಂತೆ
ದುಡಿದ ಕೈಗಳು ಸೋತಿರುವಂತೆ
ಬಾಡಿದ ಬೆನ್ನದು ಬಾಗಿಹುದಂತೆ
ನೆರೆದ ಕೂದಲು ಉದುರಿದೆಯಂತೆ
ಮರೆತ ಮಕ್ಕಳ ಯೋಚನೆಯಂತೆ
ಧನಿಕ ಮಕ್ಕಳು ಮೆರೆದಿಹರಂತೆ
ಕನಿಕರವನ್ನೇ ತಾ ಮರೆತಿಹರಂತೆ
ಶಿವನ ಧ್ಯಾನವ ಮಾಡಿದಳಂತೆ
ಹವನ ಹೋಮವ ನಡೆಸಿದಳಂತೆ
ಹರಸಿ ಮಕ್ಕಳ ಅಸು ನೀಗಿದಳಂತೆ
ಬರದ ಮಕ್ಕಳ ಕರೆಯುವುದೆಂತೆ
ನೆರೆಹೊರೆಯವರೇ ಎತ್ತಿದರಂತೆ
ಬರೆದಿಹ ಪ್ರಭಾಕರ ಕವಿತೆಯಂತೆ
ಎಲ್ಲರ ಮನೆಯ ವ್ಯಥೆ ಇದುವಂತೆ
ಬಲ್ಲವರೆಲ್ಲಾ ಹೇಳುವ ಮಾತಿನಂತೆ
ದುಡಿವುದೇ ನಮ್ಮ ಧರ್ಮವಂತೆ
ಪಡೆಯುವೆದೆಲ್ಲ ಆ ಕರ್ಮದಂತೆ
ರಚನೆ : ಡಾ. ಪ್ರಭಾಕರ್ ಬೆಳವಾಡಿ
ಹೋಳಿ ನೋಟ
ರಚನೆ: ಡಾ. ಪ್ರಭಾಕರ್ ಬೆಳವಾಡಿ
ಹೋಳಿ ಹುಣ್ಣಿಮೆ ಹಬ್ಬ ಬಂದಿದೆ
ಗೋಪಿ ಬಳಗವು ಬಣ್ಣ ತಂದಿದೆ
ಪಿಚಕಾರಿ ಒತ್ತುತಾ ರಂಗನು ಸಿಡಿಸಿ
ನಲಿದಾರೆ
ಕೃಷ್ಣನು ಬಂದ ರಾಧೆಯನು ತಂದ
ಬೃಂದಾವನಕಿಂದು ಕಳೆತಂದ
ಬಣ್ಣಗಳ ಹಚ್ಚುತ ಹಾಡನು ಹಾಡುತ ಕುಣಿಬಾರೆ
ಭುಜಗಳನೇರಿ ಗೋಪುರ ಮಾಡಿ
ಗಡಿಗೆಯ ಧೀರ ಒಡೆದದ್ದ ನೋಡಿ
ಕುಣಿ ಕುಣಿದು ಕೇಕೆಯ ಹಾಕುತ್ತಾ
ಕೂಗೀರೆ
ಮಥುರಾ ನಗರದ ಆಟವ ನೋಡಲ್ಲಿ
ವನಿತೆಯರೆಲ್ಲರು ಕೋಲನು ಹಿಡಿದಲ್ಲಿ
ನಗುನಗುತ ಜಿಗಿಜಿಗಿದು ಪುರುಷರ ಬೆನ್ನೇ
ಹತ್ಯಾರೆ
ಕಾಮನ ಶಿವನು ಸುಟ್ಟಂತೆ
ರಾಮನ ಬಾಣಕೆ ರಾವಣ ಸತ್ತಂತೆ
ಲಬೋ ಲಬೋ ಎನ್ನುತ ಜನ ಕುಣಿದ್ಯಾರೆ
ಹಸಿರು ಬಣ್ಣವ ತನ್ನಿ ಕೆಂಪು ಬಣ್ಣವ
ತನ್ನಿ
ರಾಧೆ ಶ್ಯಾಮನಿಗೆ ನೀಲಿಯ ತನ್ನಿ
ಕಾದ ಹಂಡೆಯ ಬಿಸಿ ನೀರಲಿ ಸ್ನಾನವ
ಮಾಡೋಣ ಬನ್ನೀರೆ
ಕನ್ನಡ ವರ್ಣಾಕ್ಷರದಲ್ಲಿ
ರಾಮನಾಮ
ರಘುಪತಿ ರಾಘವ ರಾಜರಾಮ
ಪತೀತ ಪಾವನ ಸೀತಾರಾಮ
ಅಗಣಿತ ಗುಣಗಳ ಶ್ರೀರಾಮ
ಆತ್ಮ ರಕ್ಷಕ ಶ್ರೀರಾಮ
ಇಷ್ಟ ಪ್ರದಾಯಕ ಶ್ರೀರಾಮ
ಈರ್ಷೆ ನಿವಾರಕ ಶ್ರೀರಾಮ
ಉದಾತ್ತ ಮನದ ಶ್ರೀರಾಮ
ಊರಿನ ಪ್ರೇಮವೇ ಶ್ರೀರಾಮ
ಋಷಿಗಣ ವಂದಿತ ಶ್ರೀರಾಮ
ಎಲ್ಲರೂ ಪೂಜಿಪ ಶ್ರೀರಾಮ
ಏನು ಧನ್ಯನೋ ಶ್ರೀರಾಮ
ಐಸಿರಿ ಗುಣಘನ ಶ್ರೀರಾಮ
ಒಳಿತನೇ ಮಾಡುವ ಶ್ರೀರಾಮ
ಓಡಿಪ ಭಯವ ಶ್ರೀರಾಮ
ಔದಾರ್ಯ ಮೂರ್ತಿ ಶ್ರೀರಾಮ
ಅಂತರಾತ್ಮನೇ ಶ್ರೀರಾಮ
ಅಃ ಎಂತಹ ಕರುಣಿ ಶ್ರೀರಾಮ
ನೀತಿಪಾಲಕ ಶ್ರೀರಾಮ
ಗರ್ವ ನಿವಾರಕ ಶ್ರೀರಾಮ
ಘನತೆಯ ಮೂಲವೇ ಶ್ರೀರಾಮ
ಙನಾಮೃತ ನೀನೇ ಶ್ರೀರಾಮ
ಚಲುವಾಂತ ಚಲುವ ಶ್ರೀರಾಮ
ಛತ್ರಪತಿಯೇ ಶ್ರೀರಾಮ
ಜನಕನ ಅಳಿಯ ಶ್ರೀರಾಮ
ಝಗಮಗಿಸುವನು ಶ್ರೀರಾಮ
ಞಕಾರ ಮೂರುತಿ ಶ್ರೀರಾಮ
ಟೊಂಕವ ಕಟ್ಟಿದ ಶ್ರೀರಾಮ
ಠೀವಲಿ ನಡೆವ ಶ್ರೀರಾಮ
ಡೊಂಕನು ತಿದ್ದುವ ಶ್ರೀರಾಮ
ಢಕ್ಕೆಯ ನುಡಿಸುವೆ ಶ್ರೀರಾಮ
(ಋ)ಣ ವಿಮೋಚಕ ಶ್ರೀರಾಮ
ತೇಜಸ್ವರೂಪ ಶ್ರೀರಾಮ
ಥಟ್ಟನೆ ಬರುವನು ಶ್ರೀರಾಮ
ದಯಾಮಯಿಯು ಶ್ರೀರಾಮ
ಧನುಸ್ಸುದಾರಿ ಶ್ರೀರಾಮ
ನಮಿಪೆವೋ ನಿನಗೆ ಶ್ರೀರಾಮ
ಪರಮ ಪವಿತ್ರ ಶ್ರೀರಾಮ
ಫಲವನು ನೀಡುವ ಶ್ರೀರಾಮ
ಬನದೊಳು ಅಲೆದ ಶ್ರೀರಾಮ
ಭರತನ ಅನುಜ ಶ್ರೀರಾಮ
ಮರ್ಯಾದ ಪುರುಷ ಶ್ರೀರಾಮ
ಯಜ್ಞರಕ್ಷಕ ಶ್ರೀರಾಮ
ರಾವಣಮರ್ಧನ ಶ್ರೀರಾಮ
ಲಕ್ಷ್ಮಣ ಅನುಜ ಶ್ರೀರಾಮ
ವಾನರ ಪ್ರಿಯಘನ ಶ್ರೀರಾಮ
ಶಬರಿಯು ಮೆಚ್ಚಿದ ಶ್ರೀರಾಮ
ಸೀತಾವಲ್ಲಭ ಶ್ರೀರಾಮ
ಹನುಮನ ಹೃದಯದಿ ಶ್ರೀರಾಮ
(ಅ)ಳತೆಗೂ ಮೀರಿದ ಶ್ರೀರಾಮ
ಕ್ಷೇತ್ರಪಾಲಕ ಶ್ರೀರಾಮ
ಜಯ ಜಯ ರಾಮ
ಜಯಹೇ ಶ್ರೀರಾಮ
ಪ್ರಭಾಕರ ಶರ್ಮನ ವರ್ಣಾಕ್ಷರ ರಾಮನಾಮ
ಓದಿರಿ ನಿತ್ಯ ಈ ದಿವ್ಯನಾಮ,
ಕೇಳಿರಿ ಈ ಪಾವನನಾಮ
ರಾಮನ ನಾಮವೇ ಪುಣ್ಯ ಧಾಮ, ಹರಸುವ
ನಿತ್ಯ ಆ ಸೋಮ.
ಶಿವ ಪಂಚಕಂ
ರಚನೆ : ಡಾ. ಪ್ರಭಾಕರ್ ಬೆಳವಾಡಿ
ಸ್ಫುಟಂ ಸ್ಫಟಿಕ-ಸಪ್ರಭಂ ಸ್ಫುಟಿತ-ಹಾಟಕ-ಶ್ರೀ-ಜಟಂ
ಶಶಾಂಕ-ದಲ-ಶೇಖರಂ ಕಪಿಲ-ಫುಲ್ಲ-ನೇತ್ರ-ತ್ರಯಮ್ II ಪ II
ತರಕ್ಷು-ವರ-ಕೃತ್ತಿಮದ್ ಭುಜಗ-ಭೂಷಣಂ ಭೂತಿಮತ್
ಕದಾ ನು ಶಿತಿ-ಕಂಠ ತೇ ವಪುರವೇಕ್ಷತೇ ವೀಕ್ಷಣಮ್ II ಅ ಪ II
ಬ್ರಹ್ಮ ಮುರಾರಿ ಸುವರ್ಜಿತ ಮೋಹಂ
ಕಶ್ಮಲ ದೂಷಿತ ಸ್ವಾರ್ಜಿತ ಮೋಹಂ
ಜನುಮಕೆ ಕಂಟಕ ಕಾರಕ ಮೋಹಂ
ತತ್ ಕ್ಷಣವೇ ತೊರೆಯಿರಿ ಮೋಹಂ II 1 II
ಅಧಿಕ ಆಸ್ತಿಯ ಗಳಿಸುವ ದಾಹಂ
ಅಧಿಕಾರದ ಮದ ಏರಿಪ ದಾಹಂ
ಅಧಿನಾಯಕನ ಜರಿಯುವ ದಾಹಂ
ಸರ್ವನಾಶದೆಡೆ ಮುನ್ನುಡಿ ದಾಹಂ II 2 II
ಸುಂದರ ವದನ ಪಡೆಯುವ ಮೋಹಂ
ಅಂದ ಭಕ್ತಿಯನು ತೋರುವ ದ್ರೋಹಂ
ಚಂದದ ತರುಣಿಯ ಭೋಗಿಪ ಮೋಹಂ
ಜನುಮ ವಿನಾಶಕೆ ತೋರಣ ಸತ್ಯಂ II 3 II
ರಾವಣ ನಾಶಕೆ ಕಾರಣ ದಾಹಂ
ಕಂಸ ವರ್ಧನಕೆ ಸಕಾರಣ ದರ್ಪಂ
ಶಿವನ ಮುನಿಸಿಗೆ ಮೂಲವೇ ಕಾಮಂ
ಮೋಹಂ ದಾಹಂ ಸುನಿಶ್ಚಿತ ದುಃಖಂ II 4 II
ಸತ್ಸಂಗ ಸದ್ಭಕ್ತಿಗೆ ಒಲಿಯುವ ದೇವಂ
ಸತ್ಯ ಸದ್ಬುದ್ಧಿಗೆ ನಲಿಯುವ ದೇವಂ
ಸತ್ಕರ್ಮ ಸಚ್ಚರಿತ್ರೆವಿರೆ ಗೆಲಿಸುವ ದೇವಂ
ತತ್ಪ್ರಣಮಾಮಿ ಆ ಶಿವ ಮಹಾದೇವಂ II 5 II
ಪ್ರಭಾಕರ ಶರ್ಮ ವಿರಚಿತ ಪಂಚಕಮಿದಂ ವೇದ್ಯಂ
ಶಿವಲೋಕಮವಾಪ್ನೋತಿ ಶಿವೇನ ಸಹ ಸನ್ನಿಧಿಂ II ಮಂ
II
ಗುರುರಾಯರ ಆಗಮನ
ರಚನೆ: ಡಾ. ಪ್ರಭಾಕರ್ ಬೆಳವಾಡಿ
ಗುರುರಾಯರ ಹುಟ್ಟು
ಗೊತ್ತೇನೆ ಗುಟ್ಟು
ಅದು ಭಕ್ತರಿಗಾಗಿ ಬಂದ
ಪುದುವಟ್ಟು II
ಇಂದಿನಾ ದಿನವೂ ಪವಿತ್ರ
ಹುಟ್ಟಿದ್ದು ಇಂದೇ ಚಾರಿತ್ರ
ದೇವರೇ ಕಳಿಸ್ಯಾನಾ ನಮ್ಹತ್ರ
ಬರಲೆಂದು ನಮಗೆ ಸಚ್ಚಾರಿತ್ರ II
ಅನುರಕ್ತನಿಗೆ ಅಭಿವ್ಯಕ್ತ
ಅಶಕ್ತನ ಮಾಡುವ ಶಕ್ತ
ಅಕ್ಷತೆ ಪಡೆಯಲು ಭಕ್ತ
ದೋಷದಿಂದಲಿ ಮುಕ್ತ II
ಅಭ್ಯಂಜನ ಮಾಡಿ
ರಾಯರಿದ್ದಲ್ಲಿ ನಡಿ
ಮಡಿ ಸೀರೆಯನುಟ್ಟು
ಇಟ್ಟು ಹಣೆಯಾಗ ಬೊಟ್ಟು II
ಮನದಲ್ಲೇ ಹುಟ್ಯಾನ
ಮನದಾಗೆ ನಿಂತಾನ
ಮನವೇ ಅವನ ಸ್ಥಾನ
ಇಂದಿನ ದಿನವೇ ಸುದಿನ II
ನಮಗಾಗೆ ಬಂದಾನ
ಹರಸಾಲು ಬಂದಾನ
ಮಾಡಿರೆ ಅವನದೇ ಧ್ಯಾನ
ಹಾಡುತ ನೀವಿಂದು ಗುಣಗಾನ II
ಮನೆಯಾಗೊಂದಜ್ಜಿ
ಕಾಲಾಗ ಕಾಲ್ಗೆಜ್ಜಿ
ಮಾಡ್ಯಾಳ ಕರಗಡಬು ಮೋದಕ
ನೋಡವ್ವ ಒಂದೇ ಹದಕ
ಪ್ಯಾಟಿಲಿಂದ ಹತ್ತಿಯಾ ತಂದಾಳ
ಬೆರಳಾಗ ಹೊಸದು ಇಟ್ಟಾಳ
ಇಪ್ಪತ್ತಾರೆಳೆಯ ಹತ್ತಿಯ ಹಾರ
ಗಣಪನಿಗದುವೆ ಅಲಂಕಾರ
ರತ್ನಾದ ಮಂಟಪದೊಳಗ
ಗಂಧದ ಪೀಠವನಿಟ್ಟು
ಬಾಳಿಯೆಲಿಯನಿಟ್ಟು ಅಕ್ಕಿಯ ಒಟ್ಟಾಳ
ಮನಿಗ ಬಂದಾನ ಗಣಪ ಇಂದು
ಭಾದ್ರಪದ ಚೌತಿಯೆಂದು
ಪೀತಾಂಬರ ಸೀರಿ ಉಟ್ಟು
ರೇಶಮಿ ರವಕಿ ತೊಟ್ಟು
ಮಲ್ಲಿಗಿ ಹೂವ ಮುಡದಾಳ
ಕೈ ಕಾಲ ತೊಳೆದು ನೀರನು ಕುಡಿಸಿ
ಮಂಟಪದ ಒಳಗೆ ಗಣಪನ ಕುಳ್ಳಿರಿಸಿ
ಹಣೆಗೆ ಕುಂಕುಮದ ಬೊಟ್ಟು
ಮೇಲೊಂದು ಹೂವನು ಇಟ್ಟು
ಶೋಢಶೋಪಚಾರ ಮಾಡೀರಿ
ವನಿತೆಯರೆಲ್ಲ ಆರತಿ ಎತ್ತೀರಿ
ಭಕ್ಷ್ಯ ಭೋಜ್ಯಗಳನಿಟ್ಟು
ಫಲ ತಾಂಬೂಲ, ನೈವೇದ್ಯ
ಸುವರ್ಣದಕ್ಷಿಣೆ ಮೇಲಿಟ್ಟು
ಕರಗಡಬು ಮೋದಕ ಜೋಡಿಸಿ
ಗರಿಗರಿ ಚಕ್ಕುಲಿಯ ಅರ್ಪಿಸಿ
ಭಕ್ತಿ ಭಾವದಿ ಇಪ್ಪತ್ತೊಂದು ಸಲ ನಮಿಸಿ
ವಿಘ್ನನಿವಾರಕ ವಿದ್ಯಾಪ್ರಧಾಯಕ
ಸಂಕಷ್ಟಹರಣ ಗಣನಾಯಕ
ಎನ್ನುತ ಗಣಪನ ಭಜಿಸಿ
ವಾಹನ ಮೂಷಕ ಆವನೀಗೂ ತಿನ್ನಿಸಿ
ಮತ್ತೆ ಬರುತಿರೆಂದು ಗಣಪನ ಕಳಿಸಿ
ಕುಣಿಯುತ್ತ ನಲಿಯುತ್ತ ಮನೆಯಜ್ಜಿ
ಕಾಯುತ ಕುಳಿತಿದ್ದ ಮಕ್ಕಳಿಗೆ
ಮೋದಕ ಚಕ್ಕುಲಿ ಕೊಟ್ಟಾಳ
ದೊಡ್ಡವರಾದಮೇಲೆ ಮಕ್ಕಳೇ
ಗಣಪನ ನೀವೂ ಪೂಜಿಸಿ ಎಂದಾಳ
ಮನೆಯಾಗೊಂದಜ್ಜಿ
ಕಾಲಾಗ ಕಾಲ್ಗೆಜ್ಜಿ
ರಾಗದಿ ಗಣಪನ ಹಾಡ ಹಾಡ್ಯಾಳ.
ರಚನೆ : ಡಾ. ಪ್ರಭಾಕರ್ ಬೆಳವಾಡಿ
